بنيت فيلا لاهلي للكاتبه نجلاء فتحي

قعدت أبص فيه ثواني طويلة، وبعدين ابتسمت. لأن تحت اسمي مباشرة كان مكتوب:"المالكة: هبة أمينة..."الأرض نفسها كانت باسمي. من خمستاشر سنة، قبل ما أبعت أول جنيه، كنت طالبت من أمي تعمل لي توكيل عشان أشتري قطعة الأرض باسمّي. وقتها كنت لسه بنت عندها عشرين سنة، وكل اللي كان في دماغي إني أبني بيت أرجعله يومًا ما. أمي قالتلي وقتها:"اعملي اللي إنتِ عايزاه يا بنتي، دي أرضك وإحنا أهلك.

"وصدقتها. لكن ماكنتش أعرف إن الأيام هتخليني أحتاج الورقة دي. فتحت موبايلي، ودخلت على ملف كنت محتفظة بيه من سنين. صور التحويلات. كل شهر. كل سنة. خمستاشر سنة كاملة. المبالغ اللي اتحولت كانت أكبر بكتير من قيمة الأرض والبيت. لكن كان فيه حاجة أهم…كل تحويل كان مكتوب في سببه: "بناء وتجهيز منزل هبة".يعني حتى لو حد حاول يقول إن الفلوس كانت هدية للعيلة…كان عندي ما يثبت العكس.

قفلت الملف، وحطيت الورق في شنطتي. وما نزلتش أواجههم. لأني لأول مرة في حياتي…ما كنتش عايزة أتكلم بعصبية. كنت عايزة الحقيقة هي اللي تتكلم. الصبح، نزلت بهدوء. لقيت أمي قاعدة مع كريم ودنيا على السفرة. أول ما شافتني قالت:"نمتي كويس يا هبة؟ "بصيتلها وابتسمت."آه يا أمي."كريم بصلي باستغراب. واضح إنه كان مستني خناقة. لكن أنا قعدت معاهم وقلت:"أنا عايزة أسألكم سؤال واحد."أمي قالت:"اسألي.""الفيلا دي ملك مين؟

"سكتوا. كريم قال بسرعة:"ملك العيلة طبعًا."ابتسمت."العيلة دي مين؟"قال بعصبية:"إنتِ هتفتحي في القديم ليه؟"طلعت صورة من موبايلي وحطيتها قدامه. "عشان القديم هو اللي دفع تمن الجديد."بص للصورة. كانت أول تحويلة عملتها من السعودية. وبعدها حطيت قدامه صورة تانية. وبعدين تالتة. وبعدين ملف كامل. قلت:"خمستاشر سنة يا كريم.""خمستاشر سنة وأنا بحول فلوس البيت.

""ولا مرة بعتلكم فلوس وقلت دي هدية. ""كل حاجة كانت مخصوص عشان البيت."دنيا بصت لأمي. وأمي قالت بسرعة:"وإيه يعني؟ ما إحنا أهلك!"رديت بهدوء:"أهلي آه.""لكن ده مش معناه إن حقي يضيع."كريم ضــ,,ـــــرب بإيده على الترابيزة وقال:"إنتِ جاية تطردينا؟"بصيتله."أنا ما قلتش كده.""أنا بس بسأل عن حقي. "أمي اتدخلت:"حقك محفوظ يا هبة."ضحكت بسخرية."محفوظ؟""عشان كده غيرتوا الكالون؟"سكتت."وعشان كده مفتاحي ما فتحش الباب؟

"كريم قال:"إحنا غيرناه عشان الأمان."طلعت ورقة تانية."والتوكيل ده كمان كان للأمان؟"وش كريم اتغير. أمي قربت مني وقالت:"إنتِ عملتي إيه؟"قلت:"ولا حاجة.""أنا بس روحت لمحامي امبارح. "سكتوا. وكملت:"واكتشفت إن الأرض والبيت قانونيًا باسمي."كريم قام من مكانه."إنتِ بتكدبي!"حطيت العقد قدامه."اقرأ."مسك الورقة. إيده بدأت ترتعش. دنيا قربت منه."في إيه؟"كريم ما ردش. أمي أخدت الورقة من إيده. وقعدت تقرأ.

ولأول مرة من ساعة ما رجعت…شفت الخوف الحقيقي في عينيها. قلت:"أنا ما رجعتش عشان أطردكم.""ولا رجعت آخد منكم حاجة.""أنا رجعت عشان أعيش في البيت اللي بنيته."أمي بدأت تبكي."يا هبة… إحنا غلطنا."بصيتلها وقلبي كان بيتقطع."الغلط مش إنك ادّيتي كريم أوضة كبيرة.""الغلط إنك بصيتيلي طول عمري كإني مجرد بنت لازم تضحي. ""ولما خلصت مهمتي… بقيت ضيفة."كريم سكت.

وبعدين قال:"طب قولي عايزة إيه؟"بصيتله."عايزة حقي.""وأنا مش هطلعك من البيت."اتصدم."إيه؟"قلت:"بس البيت هيتسجل رسمي باسمي، وكل حاجة فيه هتبقى واضحة.""وإنت ومراتك هتفضلوا هنا بشرط واحد.""إيه؟""إن محدش فيكم تاني يقول إنك راجل وأنا واحدة لوحدي. ""لأن أنا اللي شلت البيت ده على كتافي خمستاشر سنة."سكت لحظة.

وبعدين قلت:"لكن لسه في حاجة ما تعرفوهاش."أمي رفعت عينيها."إيه؟"فتحت موبايلي، وطلعت آخر ورقة. وقتها وش كريم اتغير تمامًا. لأن الورقة ما كانتش عن الفيلا. كانت عن حساب توفير قديم باسم أمي. الحساب اللي كنت بحول عليه فلوسي كل شهر. واللي كنت فاكرة إن أمي بتحوش منه عشان مصاريف البيت. لكن قبل ما أرجع مصر بأسبوع، البنك بعتلي كشف حساب قديم كنت طالبة أراجعه.